Minnesota Secretary Of State - Kev Rov Kho Dua Cov Ntaub Ntawv Lag Luam Skip to main content
Business & Liens

Zoo siab txais tos rau qhov chaw Pab rau cov Lag luam los ntawm lub xeev Minnesota Secretary of State!

Kev Rov Kho Dua Cov Ntaub Ntawv Lag Luam

Kev Rov Kho Dua Cov Ntaub Ntawv Lag Luam

Pib txij hnub tim 1 lub Ib Hlis xyoo 2026, lub xeev Minnesota yuav muaj kev tiv thaiv tshiab raws kev cai lij choj rau cov tswv lag luam uas lawv lub npe lag luam raug muab siv yam tsis tau kev tso cai. Tom qab tau hnov los ntawm ntau tus tswv lag luam uas raug cuam tshuam thiab ntxhov siab vim txoj kev kho lawv cov ntaub ntawv lag luam uas siv sij hawm ntev thiab siv nyiaj ntau heev, lub Office of the Minnesota Secretary of State tau tsim ib txoj kev npaj los pab tiv thaiv thiab txhawb cov neeg uas lawv cov ntaub ntawv lag luam raug nyiag mus siv yam tsis tau kev tso cai. Txoj kev npaj no tau txais kev txhawb nqa los ntawm ob tog nom tswv thiab raug pom zoo los tsim txoj cai lij choj hu ua Business Filing Fraud Prevention Act.  

Cov neeg raug cuam tshuam tau tshaj tawm tias muaj cov lag luam uas lawv tsis paub tau siv lawv lub npe los khiav lag luam, siv lawv qhov chaw nyob hauv tsev yam tsis tau kev tso cai, thiab muaj cov lag luam uas twb tsis ua hauj lwm lawm raug rov qhib dua yam tsis tau kev pom zoo los ntawm lawv. Feem ntau, cov neeg raug cuam tshuam tau ntsib nuj nqis ntau, muaj cov tuam txhaj hu xov tooj los sau nuj nqis, los sis lawv cov credit raug puas tsuaj — txhua yam no tau tshwm sim yam tsis muaj ib txoj hauv kev meej los daws tau tej teeb meem no. Yav tag los, cov hauv kev los daws cov teeb meem no tsuas yog mus foob hauv tsev hais plaub uas siv nyiaj ntau heev los sis nrhiav kev pab los ntawm tub ceev xwm xwb.

Raws li txoj cai tshiab no, cov tswv lag luam yuav muaj peev xwm qhia tawm txog cov ntaub ntawv lag luam uas raug siv los sis xa cuav mus rau lub Office of the Minnesota Secretary of State, uas yuav tshawb xyuas thiab tshem tawm cov ntaub ntawv ntawd yog tias pom tias yog kev dag ntxias.

 

Koj tuaj yeem tshawb nrhiav ib lub lag luam cov keeb kwm ntawm cov ntaub ntawv uas tau xa tau rau ntawm sos.mn.gov/findabiz. Koj tus zauv business filing yuav nyob rau ntawm daim nplooj ntawv Business Record Details. Cov keeb kwm ntawm cov ntaub ntawv uas tau xa rau lub lag luam yuav pom nyob rau hauv qhov filing details, uas suav nrog hnub tim uas tau lees txais cov ntaub ntawv ntawd. Nyem rau lub tab Renewal History kom pom cov ntaub ntawv hais txog thaum lub lag luam tau taub mus ntxiv. 

 

Yog muaj ib tug neeg tau siv koj lub npe, chaw nyob, los sis lwm yam ntaub ntawv ntiag tug, los yog koj cov ntaub ntawv lag luam, hauv cov ntaub ntawv lag luam uas tau xa yam tsis tau kev tso cai, los sis hloov koj lub lag luam yam tsis tau kev pom zoo, ces tej zaum koj lub lag luam cov ntaub ntawv tau raug lwm tus siv yam tsis tau kev tso cai los ntawm koj.

Piv txwv muaj xws li:

  • Koj lub npe raug siv ua tus registered agent los sis tus organizer ntawm ib lub lag luam yam tsis tau kev tso cai los ntawm koj.
  • Koj qhov chaw nyob raug siv ua qhov principal office los sis registered office ntawm ib lub lag luam yam tsis tau kev tso cai los ntawm koj.
  • Muaj ib lub lag luam raug tsim siv koj cov ntaub ntawv ntiag tug los sis koj cov ntaub ntawv lag luam yam tsis tau kev tso cai los ntawm koj.
  • Cov ntaub ntawv lag luam uas twb muaj lawm raug hloov yam tsis tau kev tso cai los ntawm koj. 

Yog koj tau tshuaj xyuas cov ntawv uas xa tuaj mus rau lub xeev thiab tsis tau kev tso cai, paub kom tseeb tias koj yeej tsis muaj feem yog tus xa cov ntaub ntawv lag luam ntawd, thiab nws tsis yog ib tug kws tshaj lij uas koj tau tso cai los sawv cev rau koj, xws li ib tug kws lij choj los sis ib tug kws xam nyiaj. Yog paub meej lawm, koj yuav xa tau daim ntawv Declaration of Wrongful Filing mus rau lub Office of the Minnesota Secretary of State kom lawv los tshuaj xyuas thiab tshawb xyuas txog cov ntaub ntawv no. Qhov txheej txheem no yuav tswj raws li txoj cai lij choj Minnesota Statutes, Sections 300.70 – 300.78.

 

  1. Ib tug tswv lag luam uas raug cuam tshuam tuaj yeem xa tau daim ntawv Declaration of Wrongful Filing mus rau lub Office of the Minnesota Secretary of State yog tias nws ntseeg tias muaj neeg tau siv los sis hloov nws cov ntaub ntawv lag luam yam tsis tau kev tso cai.
  2. Peb lub chaw hauj lwm yuav ceeb toom mus rau cov neeg uas muaj feem cuam tshuam. Yog tias tsis muaj leej twg teb rov qab hauv 21 hnub, peb lub chaw hauj lwm yuav lees txais qhov kev thov thiab txiav txim tias cov ntaub ntawv lag luam uas raug xa ntawd yog kev dag ntxias.
  3. Yog tias muaj leej twg teb rov qab, peb lub chaw hauj lwm yuav thov thiab tshuaj xyuas ntxiv cov ntaub ntawv ua ntej yuav los txiav txim siab.
  4. Qhov yuav tshwm sim::
    • Thaum peb lub chaw hauj lwm tau txiav txim kawg tias cov ntaub ntawv lag luam xa ntawd yeej yog kev dag ntxias, peb yuav ua raws li no:
      • Yog cov ntaub ntawv lag luam uas raug xa ntawd tau tsim ib lub koom haum tshiab uas yog cuav, lub koom haum ntawd yuav raug tshem tawm hauv cov ntaub ntawv kaw tseg.
      • Yog cov ntaub ntawv lag luam uas raug xa ntawd tau hloov ib lub lag luam uas twb muaj lawm, peb yuav rho tawm cov ntaub ntawv dag ntxias, thiab muab cim tseg rau hauv cov ntaub ntawv kaw tseg.
    • Yog peb tsis lees txais qhov kev thov, peb yuav ceeb toom rau cov neeg muaj feem cuam tshuam, thiab lawv muaj cai thov kom rov qab xyuas dua (appeal) mus rau lub tsev hais plaub hauv cheeb tsam yog lawv txiav txim siab li ntawd. 

 

  1. Sau kom tiav txhua seem uas yuav tsum tau sau hauv daim ntawv Declaration of Wrongful Filing Form.
  2. Xa thiab txuas tej ntaub ntawv uas cuam tshuam, xws li tej email, cov ntawv lag luam uas xa ntawd, thiab/los sis lwm yam kev sib txuas lus. (NCO TSEG: yog xa hauv mail, tej ntaub ntawv yuav tsis raug xa rov qab, thov xa cov ntawv uas yog ntawm luam xwb.)
  3. Email daim ntawv uas sau tiav thiab tej ntaub ntawv txuas mus rau: bir.oss@state.mn.us LOS SIS xa hauv mail mus rau:

Office of the Minnesota Secretary of State 
Business Services 
First National Bank Building
332 Minnesota Street, Suite N201
Saint Paul, MN 55101